【冇犯法但做階下囚】工作簽證出事 葉芳華周文健無端坐監
坐監大隻佬周文健十五億殺人網絡
行得正企得正,係咪就唔會「瀨」嘢呢?其實就未必嘅……
好似周文健(Michael)咁,喺1997年到印尼拍攝電影《十五億殺人網絡》期間,因為證件問題,Michael與及拍檔葉芳華等合共11名工作人員,被印尼政府人員捉走收監。事後電影公司老闆孫敬安交代事件,他稱事件發生於1997年1月中,當時劇組喺峇里島一間酒店嘅總統套房內拍戲,突然有當地移民局職員嚟到,要佢哋出示工作證。
周文健等人提供證件,但移民局職員認為佢哋所持嘅係工作證申請書,並非工作證,指佢哋喺未有批准而拍戲嘅理由下,將周文健、葉芳華、8個工作人員及孫敬穴本人帶晒返移民局。孫敬安又話當時已經搵咗喺耶加達一個朋友幫手,點知聯絡好之後,移民局嘅職員又收咗工,於是就佢哋收監一日。
Michael接受訪問時亦話,佢哋原已在當地開咗10幾日工,一直都冇事,點知被移民局啲人去酒店攞走晒佢哋全部人嘅護照,然後叫佢哋去移民局辦公室,再安排佢哋去一間大房後,就係嗰間監獄。
Michael事後憶述「坐監」嗰28個鐘,佢話係11個人困喺300呎左右嘅大房,又細又污糟,廁所又邋遢,苦不堪言,加上當日落雨又漏水,坐喺入面餵虱。起初佢哋連食物都冇,後來導演(鄧衍成)嘅太太攞嘢畀佢哋食。
不過,Michael話最難頂係「坐監」期間,隔籬房有個外籍女子,成晚大吵大鬧,Michael當時猜想對方可能神經有問題,成件事都係噩夢。
周文健拍《十五億殺人網絡》時不幸入獄(互聯網圖片)
佢事後重提呢場28小時監禁,話係噩夢。(互聯網圖片)
但套戲個焦點,去到Michael同葉芳華呢場激情戲。(互聯網圖片)