【20年冇上台唱歌】做克勤演唱會嘉賓 鄺美雲自爆花名叫「鄺左面」

蘋果日報 2017/09/05 15:57

李克勤廣美雲鄺左面
    噚晚李克勤第2場演唱會，請到20億富婆鄺美雲（Cally）做嘉賓，退出樂壇20年嘅Cally唔單止開金口唱歌，仲爆自己有個花名叫「鄺左面」，笑爆全場。
    克勤介紹Cally出場時話：「佢嘅珍貴同稀有度係滿分，因為佢從未試過做演唱會嘉賓，我叫佢做家姐。」着黑色Dior裙襯20卡巨鑽耳環嘅Cally隆重登場，有觀眾大叫：「靚過晒依家班港姐！」當年克勤參加歌唱比賽，Cally負責做司儀，之後兩人做埋師姐弟，克勤話：「Cally經常塞錢入我袋，見到我皮膚唔好會送護膚品，總之咩都送，爭在未送樓。我結婚嗰時，佢送好靚嘅鑽石袖口鈕、心口針，呢個家姐真係冇得頂。」
    今次克勤開騷搵咗好多朋友拍短片，但貪靚嘅Cally拍完卻唔畀播：「唔出係有原因，我睇咗片之後，你知道我以前有個花名『鄺左面』，因為我覺得左邊面靚啲，試過以前喺電視拍嘢，有三部攝影機，導演鬧攝影師：『你點樣拍㗎？拍極都係嗰個shot嘅樣。』因為佢一路轉，我跟住一路轉，我自轉。」克勤聽到大笑，即話一陣拍時叫導演跟住轉，Cally：「咁就唔得啦，依家年紀有番咁上下，轉得多會暈。」
    20年冇上台嘅Cally，開金口合唱《只有情永在》及獨唱《堆積情感》，寶刀未老，佢笑住話：「好多人直情唔知我係識唱歌，以前做過歌星。」
    empty
    empty
    噚晚克勤演唱會，就請到「家姐」鄺美雲做嘉賓。
    empty
    鄺美雲原來有個花名叫「鄺左面」。
    empty
    empty
    容祖兒同媽咪噚晚都有嚟睇。
    empty
    仲有克勤老婆盧淑儀同蔡少芬。