鄭秀文（Sammi）曾經喺事業嘅高峯期患上抑鬱症，當年佢對自己要求極高，為保纖瘦身形不停節食減肥，又唔容許自己演出有任何差錯，加上非常介意其他人嘅批評，面對各種各樣壓力，一下子爆煲，搞到抑鬱，幸好佢最終得到宗教和朋友幫助，重獲新生。
噚日Sammi同立法會主席曾鈺成喺鑽石山出席香港世界宣明會舊書義賣活動，Sammi仲攞咗本關於哲學嘅小說出嚟義賣，佢話自己之前患抑鬱嗰段時間睇咗好多書：「喺depression嗰時睇最多呢類書，講有關人嘅嘢，覺得人呢個生物好有趣，可以抽離吓抑壓嘅情緒，睇得投入忘記depression，有咗信仰之後就睇聖經。」

當年肥腫難分

Sammi初出道肥腫難分，當年Sammi話自己連飲水都肥，𠵱家一直保持鋼條嘅健美身形，相信唔少人都好想知究竟佢食乜嘢同做啲乜嘢？𠵱家機會嚟喇，Sammi話佢明年夏天打算出減肥書：「準備緊出一本教人減肥嘅書，冇打算喺書展出，但覺得冬天出冇人買，應該喺明年夏天推出。」
另外，Sammi同杜德偉之前幫網絡平台拍廣告片，將當年許志安被誤認係杜德偉嘅事當做賣點，佢話：「我俾番安仔睇，佢睇4次都笑到碌地，佢覺得杜生咁樣出場好舒服。」
撰文：馮仁昭