林盛斌（Bob）同老婆Pearl、趙勁皓(King)同老婆盧頌之(DaDa)等，今日喺九龍灣出席「Peppa Pig動感假期」發佈會，Bob話小朋友都係Peppa Pig嘅忠實粉絲，問佢哋兩公婆有冇陪囡囡一齊睇？Bob就大爆老婆好嚴，佢哋話：「佢哋隻眼唔好，遺傳咗我哋嘅近視，所以多數係睇書，每日只可以用10分鐘放喺電子媒體上面，仲要自己分配睇乜。」阿Bob話：「佢哋多數睇外國歌手MV，仲會表演畀我哋睇，我就好似《我是歌手》嘅觀眾，畀晒反應扮喊。大女o依家學魔術，我唔使再扮鬼扮馬，佢娛樂番我。」

父親節當日，阿Bob要開工，但喺上星期已經同爸爸、外父一齊食飯慶祝咗，提到佢將父子合照放上網，畀網友話阿Bob爸爸比自己年輕，阿Bob話：「我老竇都67歲，佢後生嘅時候似謝賢㗎，而我老婆嘅爸爸就似劉德華，如果有隔代遺傳，我個仔係謝賢同劉德華嘅crossover，乜嘢女都畀佢媾晒。」至於暑假，Pearl會同子女們去加拿大個幾月，而阿Bob因為太忙，期望可以去三日兩夜親子樂。

另外，King同DaDa帶同一歲多囡囡出席活動，佢哋都話遲啲先考慮生第二胎，King話：「都希望追個仔，同我一樣，有家姐照顧弟弟。養一個已經好吃力，經濟上、心靈上都係，因為想多啲時間陪囡囡，如果再生怕分散咗。」而DaDa話o依家個心都喺晒個女度，好似有條線牽住咗咁，就連出街同朋友約會都會掛住個女，就連同老公King二人世界嘅機會都好少，DaDa話：「BB出世咁耐我哋都冇兩個去旅行，因為會好唔捨得，之前去過日本，不過都帶埋囡囡。」佢哋仲話聽日會一家人食飯，提早慶祝父親節。

精選娛聞，喺晒《娛果》
http://fb.com/appledailyent