梁詠琪（GiGi）、Ana R.同余慕蓮等，今日喺淺水灣出席Montblanc supports UNICEF「書寫之禮」閉幕禮，GiGi囡囡Sofia雖然未有出席，但就畫咗一幅「抽象畫」支持活動，GiGi透露囡囡好鍾意畫畫，但作品係抽象派，需要繙譯，GiGi話：「佢好乖，唔會畫梳化，只會畫紙，細個有指定嘅櫃門等佢自由發揮。」

除咗畫畫，Sofia仲好喜歡唱歌跳舞，問GiGi有冇安排囡囡練首歌唱畀老公聽作父親節禮物？原來GiGi唔記得咗聽日係父親節，佢話：「哎呀，冇準備o添，我聽日飛上海做電影節，不過佢可以獨自霸住個女，已經係最好嘅禮物。」問佢兩公婆係咪會爭住湊囡囡？GiGi笑言爭不過老公，佢話：「佢係頭號奶爸，佢好enjoy湊女嘅生活。」

講到之前去馬來西亞探望好友楊采妮嘅孖B，GiGi話Sofia都有同行，返到屋企仲會扮采妮姨姨將兩公仔放入衫內裝大肚有孖B，問GiGi想唔想懷孖胎？佢就話：「好忙㗎，唔好嘞，做完嘢睇吓有冇呢個福氣，年底休息吓先，下年先有時間生B。」

另外，Ana嘅1歲半女兒Maya因發燒留喺屋企休息，未能一齊出席活動，Ana話：「因為天氣轉變，Maya發燒了，39度，是她出生後首次發燒，我徹夜未眠照顧她。」聽日就係父親節，Ana話老公喺母親節時乜都冇準備，連花同晚餐都冇，問佢係咪冇安排活動作「報復」？Ana笑言：「不是，我已安排好明天有個brunch，之後做spa，等他內疚一吓。」

而慕蓮姐呢個月舊曆80歲生日，問佢會唔會搞大壽？佢話：「使乜呀？好多朋友好似吳麗珠、佘詩曼媽咪都會幫我慶祝。」佢仲話噚日請咗15位好友吃飯，至於生日願望？慕蓮姐話：「身體健康！最近簽咗個藥貼品牌兩年，算係最好嘅生日禮物。」