參加「香港經濟峯會2007」，見到唔少財經界朋友及廠家，四季酒店宴會廳坐到滿晒。神童輝今日貴為《信報》執行董事，是日着一套整齊西裝到場，少見也。平時佢返工都係着牛仔褲嘅啫，梗係啦，《信報》與「新城財經台」辦經濟峯會，不經不覺已經係第五年，今年有財經事務及庫務局局長陳家強致開幕詞，財政司司長曾俊華作午餐演講嘉賓，神童輝代表主辦單位之一，點想失禮。
左丁山碰到一位高級賓架，佢已經離開銀行界，在大富豪嘅集團工作，平時非常低調。大家傾傾吓，傾到陳太「十成按揭」一事，問佢以銀行家角度，點睇呢件事，呢位賓架A話：「冇事搵事搞啫。銀行只要相信某人有還款能力，借OD（透支）畀佢買樓都得，唔使抵押㖭，喺呢個情況嚟講，根本冇十成、七成按揭之事。銀行貸款，只講風險與回報，不及其餘。如果認為某人係高風險借款人，即使有多多抵押品，例如兩成按揭，都唔會借錢畀佢。」
至於民建聯話要召任志剛到立法會財經事務委員會解釋，賓架A就為任總唔抵：「關佢乜事啫，銀行冇錯，金管局冇錯，唔通要任總責罵間貸款銀行咩？好過份啫，任總好明白bankingpractice，唔會講錯嘢嘅。」這個當然，但係一啲立法會議員對銀行業務之認識，有如小學生，任總做老師都會激死。
回憶起嚟，一九九三年之時，陳太向恒生借錢買樓，當時恒生董事長係利國偉爵士，總裁係歐肇基，有利Sir在，恒生銀行唔需要討好或畀優惠任何高官，佢老人家當時在金融界一言九鼎，受各方尊重，𠵱家有人想翻查舊賬，唔知夠唔夠膽傳召利Sir到立法會解釋呢？
休息時間，碰到廠家S，佢又講起立法會補選，原來與中方有關人士全力為十二月二日之選舉助選，喺珠三角開廠港商曾收到電話，要求提供住在港島嘅親友數目，再問佢哋係唔係選民，跟住叫廠商幫手拉票。十二月二日晚上七時許，廠家S仲收到電話，請廠家S向親友選民告急！