今夏轉會市場瘋狂，尼馬打破世界轉會費紀錄，踢咗一季好波嘅奧士文尼迪比利，都已經成為第二高身價球員。自然令唔少名宿酸溜溜，好似前曼聯防中堅尼就話，如果碧咸、傑斯宜家先出道，呢對曼聯雙翼總值30億鎊（約300億港元）。

堅尼接受訪問時話：「宜家轉會費高得難以置信，呢個唔係球員問題，係市場問題，有啲實力球員，已經3500萬鎊（約3.5億港元）起標，真正出色球員更加天價。」堅尼話如果以前曼聯隊友宜家先出道，荷蘭前鋒雲尼斯達羅值10億鎊，碧咸值10億鎊，傑斯值20億鎊，不過堅尼就有自知之明，話宜家都只係仲值375萬鎊，相當於佢1993年由森林轉投曼聯身價。