廣深港高鐵香港段本月23日通車，雖然西九站嘅神秘B5層惹嚟爭議，部份內地人員原來會過夜又令唔少人譁然，但相信任何風波，都唔會阻到高鐵開通㗎嘞，運房局都開始大打宣傳戰，今日上載兩條短片，搵嚟無綫前新聞主播鄭萃雯拍住姚雋彥拍片，等大家對西九站內嘅「內地口岸區」注意事項，了解多一點。睇片按此

查實大家最關注嘅，可能係點樣先算踏入內地口岸區？片中就有解釋，有條黃線清楚標示，一過界就要守內地法律，唔會似中央所謂嘅紅線，踩中咗都未必知。咁入得「內地口岸區」，當然要守內地法，但如果有罪案發生，除咗向駐守執法人員求助，運房局話都可以聯繫港鐵職幫手，當然亦都可以打999求救，就算有火災，香港消防員都會出動㗎喎。

咁如果用流動通訊網絡服務，係咪會收漫遊費？運房局強調依然係用緊香港嘅網絡訊號，唔需要交漫用費，就算係上網，所瀏覽嘅內容都同香港其他地方一樣㗎喎；講嚟講去，無非都係大派定心丸，等大家支持下高鐵，唔知出動前主播，會唔會加強吸引力？