丸龜：

當你睇到呢封信既時，你已經係一子之母，成為「譚仔」嘅媽媽。即係咁，「譚仔」我雖稱唔上超級擁躉，但總算係資深食客，多少都有資格講兩句意見。

丸龜落場，你新人事新作風，話要將「譚仔」重塑品牌、重新定位，係明嘅。不過你買得「譚仔」，都係貪佢夠受後生仔歡迎，如果你想佢繼續做強做大，以下一點，係千萬萬萬不能改變，就係「勿演畜牲美線實小勒凍拎死」！

如果你見到呢串字，大喝一句「何ですか？」然後以為我講粗口，咁樣，即是你哋做唔足Research，唔明「譚仔」核心價值！

「譚仔」最重要嘅，唔係米線，唔係湯底，係啲阿姐！仲要係有鄉音嘅阿姐！食得多咗，對得耐咗，每個行入去食米線嘅人，都已經識得翻譯「勿演」做墨丸、「畜牲」做竹笙，「凍拎死」係凍檸水…之如此類。

一路都覺得「譚仔」好勁，勁就勁在，佢唔單止做到湯底standardization，係連阿姐嘅Style、以至口音都做到standardization！久而久之，「譚仔口音」已經變咗做品牌一部分。

如果行入「譚仔」，我聽唔到譚仔腔，而係講得一口純正廣東話嘅阿姐，你話似咩樣？咪就係好似你行入澳牛，個夥記好誠懇、好Sincere同你講一句「唔該」一樣，一樣咁離譜！

更重要係，你要知道「譚仔」41間舖，年做6.9億銀生意，一年賺9,600幾萬銀，即係每收100就賺14蚊，「譚仔」明副其實係發鈔機！翠華（1314）生意做得多過「譚仔」，但一年只係賺7000幾萬，但市值都成17億，25倍PE。你收購「譚仔」先用10億銀，即係10倍PE就買到發鈔機，係真係好抵好抵！而呢部「印鈔機」之所以印到鈔，就正正係由一班Style異常地一致嘅阿姐一齊建立。即係咁，阿姐鄉里喺同一間公司，員工流失率相對低，相信係「譚仔」異常高效率原因之一。

香港能夠容納兩間幾乎一樣嘅「譚仔」，係因為「譚仔」有佢獨有嘅基因，獨有陣除。所以，丸龜呀丸龜，千萬咪直線地以為，要令品牌進一步年輕化，就趕走班姐姐，然後搵班後生仔扮日本人，等你行入大門就大叫「21314！」咁就吸到新客。你咁做，會將「譚仔」推向絕路？唔會唔會，反而係「三哥」，佢會同你講，「丸龜，多謝你，係你令我終於可以成就一統『譚仔』天下嘅霸業。」

by千頌C@堆填區

掌握財經生活資訊，即Like「蘋果ATM」fb專頁啦！
http://fb.com/appledailyatm