窩輪搏擊:博長建破位買7999 - 俊樺

蘋果日報 2007/04/30 00:00


港股上禮拜五期指結算,好淡雙方爭持激烈,恒指與一個禮拜前嘅指數比較冇大變化,但睇番花旗股市上禮拜日日新高,咁樣應該話港股嘅淡友贏咗,不過,同3月尾恒指比較,好友重有斬獲。
期指結算完咗,淡友子彈用盡,是否輪到好友反攻,好快就知,不過明日係假期,股民入市興趣未必好大,或者睇埋今日同明日花旗股市點走先決定入市策略。
道指升破13000關,後市會點?《蘋果》昨日為大家做咗個統計,道指每升1000點,後市有67巴仙機會上升,咁樣睇即係話美股幾大機會繼續升,不過,13300有啲阻力,𠵱家或者會喺呢個水平唞吓先,睇幅圖,道指守得住12909,沽壓應該唔會好大。
長建C輪7999:3月21日介紹過長建C輪7999,當時正股(1038)25.35元,睇28.50元,7999睇25仙,上禮拜五正股收29.40元,隻輪收23.5仙。正股有破「頭肩底」走勢嘅款,如果破埋30同31元兩個位,可以炒上35元,買番啲7999博佢破位。隻輪槓桿率12.5倍(有效6.1倍),正股升上35元,隻輪睇60仙,就算見33元,隻輪都值45仙,正股跌穿28元止蝕。
俊樺
empty