一句「苦等十年,只求觀眾講得出我個名」,無綫藝員鄭俊弘喺《星夢傳奇》第一集表現出色,成為高分王,節目出街後就成功彈起,今日仲成為報章C1頭條人物,唔少街坊叫佢加油。
今日鄭俊弘應新城邀請接受直播訪問,之後接受傳媒訪問時,佢第一時間拎起手機拍低留念,佢話:「 我第一次做訪問,好想拍底佢做留念。 」可惜呢個重要時刻,竟欠缺佢公司TVB採訪隊。
鄭俊弘不停傻笑做訪問,佢話:「 感覺好似發夢咁,出到街好多人鼓勵自己叫自己個名,錄影時完全冇諗過會有今日咁嘅反應。 」
有指錄播版本cut晒梁烈唯同黃智雯被巫啟賢狠批片段,鄭俊弘覺得可能出街版本有時限,所以保留大家演出片段,而刪走以外片段,不過佢都贊成可以喺網上播放足本版,等觀眾睇得更原汁原味。
第一集巫啟賢畀佢全晚最高分,到第二集錄影時就獲巫啟賢邀請,擔任今個月27號喺會展舉行嘅演唱會嘉賓,嚟緊禮拜日佢會為第三集錄影, 問到有冇信心? 佢話:「 都係唱好首歌,仲有兩個新參賽者加入。 」
講到有指評審有造馬之嫌,佢話:「 唔覺,大家都好真實,評判都現場觀眾都冇得造馬。 」
另外,「卡拉之星」鄭世豪喺網上指入選準則有太多數要計,鄭俊弘讚鄭世豪唱得好好,不過其他嘢就唔知,自己都唔識計數,又話希望佢之後有機會參賽,亦唔知對方有冇簽經理人合約。
鄭俊弘有冇諗過出碟?佢話:「我諗就成日諗,平時都有夾Band同創作,暫時未有唱片公司招手。」
一句到尾,《亂噏24》!
倪匡、蔡瀾同肥佬黎約埋高談闊論,第一集仲有宅男女神周秀娜低胸迎戰,嘩!
7月11日起,逢星期4晚11點,蘋果網站動Live預埋你。 http://bit.ly/14Bg2SP