A股開門紅喪升近半成，恒指H指卻倒跌收場，掃興程度達十粒星。近期每當股市出現千億成交，往往就係指數見頂之時，故惹來千億魔咒說法。噚日，港股成交「不幸」再度突破千億，係咪意味大市散band？今次唐牛進入樂觀mode，相信故事情節唔會好似TVB劇集咁千篇一律。原因有三個。第一，A股明顯進入瘋牛狀態，要㩒都㩒唔住，港股升幅就算打個五折，都應該未升完。第二，大市近期只係上落市格局，唔存在高位派貨，點解咁大成交？邊個買？自己諗啦！第三，信1月效應！舊年基金輸到仆直，難得而家搵到中資股炒，畀着係你都捉實唔放。食唔食到馬年股市尾糊，真係睇今鋪。