何韻詩一連六場嘅《On The Pulse Of 我們正在演唱會》，噚晚繼續喺沙田科學園嘅露天場地舉行，原本閃靈樂團係噚日都有份演出，但因為工作簽證一直不獲簽發，最終未能來港演出，最後由前日已表演過嘅周國賢再演一場。

噚晚港九新界都落雨，而且雨勢有時頗大，阿詩嘅舞台雖然有瓦遮頭，但佢見到台下樂迷淋住雨睇都咁興奮，佢就索性豁出去，主動走去台前淋住雨唱歌，有歌迷擔心佢太忘形會跣低，不停大叫佢小心，但阿詩就超High，唔單止無停落嚟，仲走去台邊玩水。

完騷後阿詩話：「真係超級大雨，其實製作組都好擔心，千叮萬囑我落雨就企喺有嘢遮嘅地方，不過見淋到半濕，索性行出去同歌迷一齊淋雨，大家都勁High。」問阿詩怕唔怕會漏電？佢笑住話：「其實結他、咪同各樣嘢都有機會淋壞，都唔理得咁多，成個感覺好似ColdPlay（英國搖滾樂隊）演唱會咁，喺香港好難有咁嘅氣氛底下做騷，其實有部分器材都淋壞咗，好彩冇影響流程，順利完成個騷。」

講到樂迷睇得好投入，阿詩就話之前已叫歌迷自備雨褸，佢自己就內功深厚唔會有事。阿詩仲講笑話:「我都係嗰啲遇到大風大浪就會發揮小宇宙嘅人，我條命係咁。」

精選娛聞，喺晒《娛果》
http://fb.com/appledailyent