韓國天團BIGBANG已經有4位成員入咗伍，年紀最細嘅成員勝利日前亦預告將於今年內入伍，粉絲最快要2020年先見到BIGBANG齊人活動。BIGBANG喺本周二、成員大成入伍當日推出新歌《花路》以慰粉絲，而截至韓國時間今早9點，《花路》連續第4日包攬Melon、Genie、Soribada等七大音源榜嘅榜首，力證BIGBANG人氣。

另外，勝利早前為MBC人氣綜藝節目《我獨自生活》錄影，節目噚日播出最新一集。勝利喺節目中同新婚成員太陽傾電話，坦言好羨慕太陽嘅新婚生活，仲叫閔孝琳介紹女仔佢識，而太陽及一眾主持人就立即追問係咪喺婚禮上有合眼緣嘅人，勝利就怕醜地表示係與閔孝琳合作過韓片《陽光姊妹淘》嘅30歲女星千玗嬉。

隨後勝利訪問時亦大讚千玗嬉性格開朗，又指：「婚禮當日太忙，冇問到佢拎電話，所以只好關注佢Instagram，不過對方都有關注返我，而當日曾約定《陽光姊妹淘》一眾演員要飯聚，所以先咁樣問太陽哥。」

更多韓流，喺晒《娛果》
http://fb.com/appledailyent