自由黨田少俾北京「搣柴」冇得做政協，好多建制派幸災樂禍，乘機落井下石奸笑「京式炒田螺」，又話佢今鋪玩完、又話佢冇跟中央，八方噚日見到田少，佢似乎冇事一樣，仲係咁瀟灑，仲話唔使去北京開政協會，咪有時間去多次滑雪！
話說連自由黨黨魁都辭埋嘅田少，噚日好輕鬆去立法會開會，佢見到記者依舊笑面迎人，一啲都唔似有心事。佢被「搣柴」後，八方知道好多政圈友好第一時間慰問佢，但田少話佢啲仔女同埋孫仔，唔單止冇慰問佢，直頭唔覺得係乜嘢咁大件事。

想同屋企人頻頻滑雪

田少自己就更加豁達，正如佢開記招時所講，家陣佢除咗打算趁年尾聖誕、新年時同屋企人去滑雪外，仲諗緊好唔好出年3月再去多次，因為佢原本預咗3月上北京開政協會，一般都係預兩個星期左右，由於要遷就兩會，立法會喺呢段時間都要讓路唔開會，田少諗既然兩會唔使開，立法會又唔使開，梗係同屋企人去滑多次雪好過啦。
講開田少俾北京「搣柴」，原來多次狠批狼英嘅工聯會陳婉嫻，日前都被召咗去西環疑似照肺。嫻姐噚日就話自己只係是其是、非其非，企喺工人呢邊，所以冇俾人照肺喎。同為政協嘅佢冇慰問田少，只係同田少「say個hi」。反而經民聯林健鋒前日就俾影到同田少密斟，似係安慰田少，林健鋒噚日故作神秘，唔肯透露佢同田少有咩密偈傾。
有網民好有心機，製作田少CD封面，讚揚佢寸CY、諷刺老董句句有骨，八方同好多網民一樣，期待CD上市，實買嚟珍藏。

李八方
mailto:[email protected]