李克勤同容祖兒將於9月喺紅館舉行演唱會，而門票原定下月16日先公開發售，點知主辦單位近日發現有人非法偷取未經授權曝光嘅演唱會海報照片，更於海報上公然加上私人電話號碼，揚言可以代訂內部認購門券，照片近日於社交網上群組不停發放，令主辦單位極為震怒，揚言必以法律追究。

而主辦單位表示，佢哋曾嘗試聯絡該自稱可以代訂內部認購門票嘅電話，對方公然表示代訂門票需要加收費用，$780門券每張加收$250手續費，$480及$280門票，每張加收$170，訂票人需先付百份之八十費用，又揚言可以訂到靚位門票。有見及此，主辦單位今日發出公開聲明，希望公眾勿被非法之徒騙財。而祖兒及克勤亦勸喻歌迷切勿上當。

李克勤回應說：「收到呢個演唱會海報短信大吃一驚，唔知乜嘢渠道流咗出去，畀老竇及親友寸我：『喂，你又話未落得飛，點解0依家周圍都有啦喎，咁唔使搵你啦。』唔係好明白世界點解會變成咁？希望歌迷一定要經正確途徑，去買演唱會飛。當然大家咁期待咁睇好我哋個騷，我好開心，但都唔應該不法咁去買飛，希望大家都係用正價買飛囉！好彩我哋個演唱會海報有兩款，0依家被人偷咗一張，另外個張我哋會放係夾萬入面。」

容祖兒則回應：「克勤喺我哋演唱會聯絡group中，send咗張相出來，一望之下，原來係我哋張演唱會海報，但係張相裡面加咗一啲字體，有不認可機構單位話可以優先訂購我哋演唱會門票。收到呢個消息，我自己係北京心情好複雜，知道大家好期待對我哋演唱會好支持，但亦令不法之徒乘虛而入。」