今日係人氣韓劇《太陽的後裔》嘅宋仲基同宋慧喬嚟香港嘅大日子，有逾400名粉絲一早撲入機場，等待雙宋駕臨，雖然最終雙宋現身只係匆匆10多秒，但一眾粉絲已經超級開心，事關宋仲基現身時相當親民，不時向兩邊粉絲勁揮手，真係冧死粉絲。

而雙宋分別乘坐兩架唔同嘅房車離開，當中有粉絲就包咗合共12架貨Van追車，點知韓國方面工作人員就安排7人車喺青嶼幹線附近截停粉絲嗰啲車，而期間工作人員嘅車隊就同粉絲車隊展開追逐大戰，特別係工作人員嘅車隊為咗阻止粉絲追車，就不惜瘋狂超速駕駛，過程險象環生，好易發生車禍。

雖然粉絲就被阻止追車，但佢哋都冇放棄見雙宋嘅決心，仲繼續追趕時間，最終粉絲車隊亦終於成功去到雙宋下榻嘅中環四季酒店，但就未能見到雙宋下車嘅情況，認真慘慘豬。