NewBalance100周年，代理送來了紀念品一包，當中包括小小座枱鐘。哈，送鐘？的的骰骰，好有格調。另附上NewBalance歷史巨冊一本，看得人愛不釋手。記得當初着「撩爆輪」既喜歡它夠Nerd夠鈍，同事團購有折，買了576、1300來穿，穿過後不想穿其他牌子了，它們都陪了我6年以上，結果鞋底磨穿了，車線還是那麼穩固。「嘩，咁先係鞋嘛。」之後有折無折，都買。女同事講起波鞋都會問：「NB係咪好好着?」肯定係！我肉緊的答。「哦，但係我係唔會買的。」十多年前我以為她們明的，因為當年看江口壽史畫的插畫，少女都穿NB，奈何香港行貨款式都不Fancy。香港女士的不了解NB，就像男人不明白乜Bra好戴，你無用過，唔知的。於是我解釋：你知唔知NB從來不用花錢聘用代言人的？你又知唔知因為NB無上市，所以當年老闆JimDavis因為不滿製作水準，可以「把幾火」將幾萬對波鞋銷毀？不過答案一樣：「唓，唔買，對對都一樣。」

男人換條胎會覺得部車型咗，因為深藏不露就係型。在傳統價值舊世界，講質素、講Authentic，NB賣來賣去都係嗰十幾款，好似個日日喺公園練功夫的男人。在新世界，個個月出新款，軟件未寫好有Bug都敢賣畀你，電子產品亦一樣。新世界的新人類，要等消委會出咗報告先知減肥腰帶的效用近乎零，自己一直係隻白老鼠。