上個禮拜，跟風學人去睇「達明」演唱會，現場大部份係型仔型女，個個都係品味之士，斷估屬高消費力一族。場中巧遇人到中年嘅潮界金牌經紀大隻標，仍堅持一身街頭型人打扮，雖已入秋涼頸上仍搭上BeamsBoy大毛巾，腳踏Yeah爆潮鞋MT580，身穿比欣宜個頭還要大的BathingApe猿人CrossoverT恤，難免叫人留下深刻印象。

大隻標雙手拉着他頸上那條曾紅極一時的BeamsBoy毛巾訴苦：「冇喇！冇喇！呢次玩完喇！經濟稍為有啲起色，業主即刻玩加租。早排見手鬆，侵咗少少股份落旺角個老友間波鞋舖度，雖然生意唔算好，但總算搵到啖食，點知轉頭個業主話自由行之後人流多咗，係時候加租，一加就五成！你話死未？聽花園街班老細講，有間舖本來18萬月租已經難捱，業主講明租約期滿後要加到起碼26萬，追番個巿價咁話，26萬月租一間波鞋舖點做吖？𠵱家個個業主愛搵自由行嚟做藉口，以為香港得救，唔怕老實講，呢啲實屬虛火，自由行只旺到影音零售同金舖。你睇吓西洋菜街就知喇，啲業主想將花園街租價同西洋菜街睇齊，行內人話到時會有好多人唔續租，只得影音舖接棒，到時旺角影音舖就多過投注站；政府咪乘機高叫香港一於變身成影音港，話唔定勁過日本秋葉原㖭！」

主持人：大食Jack
八卦熱報：[email protected]