大台同大陸網台合拍嘅網劇《飛虎極戰》噚晚喺尖沙嘴搞咗個煞科慶功宴，近年好少喺香港拍劇嘅吳卓羲(Ron)，佢話隔咗14年再同黃宗澤再合作，感覺當然好開心，阿Ron仲話今次仲好有艷福，喺劇中分別同陳凱琳和何佩瑜有床上戲，佢好搞笑咁話：「話你知吖，我拍戲咁耐，第一次有咁多女朋友，而且個個都咁靚，仲要喺一日之間拍晒兩場床戲，不過始終電視尺度有限，所以唔會太激！」

陳凱琳話佢事前都有同男友鄭嘉穎備案，阿Ron聽完之後搞笑話：「唔怪得嘉穎冇再聽我電話喇！我都驚㗎，唔知佢點諗！」唔知到時又會唔會叫男友唔好睇呢？點知陳凱琳話：「我反而會叫佢唔好拍親熱戲！」

黃宗澤喺劇入面，除咗同王敏奕有感情線外，仲會反串扮女人，阿Ron抵死話：「佢扮女人真係好吸引，佢未轉身望我，我已經俾佢嘅背影吸引，點解可以靚到咁嘅樣！」黃宗澤就話：「但係三哥一睇見我嘅樣就話想嘔，我想錫佢都話唔得！」

三哥話同佢哋合作好開心：「成套劇有好多男仔，我都冇體力同佢哋玩！」遲啲三哥又會去泰國拍遊戲節目，同場有洪永城同黃翠如等一班演員，唔知到時三哥會唔會騷肌？三哥笑笑大話：「我邊有肌肉可以騷？騷肌呢啲嘢梗係留俾啲後生，我驚騷肌觀眾會熄電視！」