香港有唔少怪獸家長，為咗下一代讀間心儀學院，不惜花費銀彈。今日就有報道話，哈羅香港國際學校明年起，就會取消低年級嘅繁體中文課程，只會用簡體學中文。校方指有必要助學生做好準備，應付2047年的香港。報道又引述指，6年級或以上學生，將會暫時保持繁簡混合課程，之後陸續過渡至全簡體中文課程。

不少家長認為校方事前未有作出諮詢。好似唔做大律師，轉做補習老師嘅林作，就寫咗篇長文，發表佢嘅睇法。林作講到佢之前喺英國讀哈羅時，都有修中文科，老師仲係一位來自北京大學嘅miss，係講普通話同寫簡體字，佢話當時大部份華人都係香港仔，校方搵個大陸老師嚟教，佢哋絕冇怨言。林作指出，有問題的，不是哈羅，而是家長。

林作寫道：「鬼佬學校，睇嘅係大局，有咩可能叫學生專注大陸唔通行嘅廣東話、繁體字？問題唔係出喺學校度，而係選擇將自己孩子由小學、甚至幼稚園就送去呢類學校嘅香港家長。

「我認為，做得香港人，就應該先學好自己文化。咁當然應該先讀本地名校小學。男拔、我摯愛女拔，歷史仲長過我喺哈羅同邱吉爾相同嘅宿舍，呢種有著光輝傳統嘅學校你唔捧，你覺得開咗兩年油漆未都未散嘅學校先係靠譜，我只可以話呢啲家長本身應該都係土豪，唔識啲咩歷史，一味崇洋。」林作講緊嘅嗰班家長，當然係經濟能力有番咁上下，一心將仔女送去名校或外地升學嗰班……

林作續寫道：「事實係，香港真正上流社會家長，一定送個仔讀聖保羅男女小學，個女去女拔小學，初中讀幾年國際學校或英國預備學校（prep school），然後高中到英國名校升學。小學讀港羅？well, you are not one of us.

「時至今日，哈羅大部份華人學生依然係香港人。憑著嘅，就係我地自己本地名校嘅實力。英國佬心水清得很：叫得Lam，唔係Lin，熟悉嘅香港學校名出嚟，就係信心保證。

「香港哈羅要用簡體字，就隨它啊。香港人，本來就唔應該喺嗰度出嚟。」

今日我哋打過俾林作，佢話︰「好簡單，其實學校咁諗係無可厚非，只係表面問題，同根本問題嘅分別。表面上，班家長覺得學校冇諮詢佢哋嘅意見係唔啱，但班家長點解唔諗下根本嘅問題，點解你要送你啲仔女入去讀？」

「我只可以講一句，食得鹹魚抵得渴。當初間學校都有開過呢班，依家只不過係打回原形，班家長當初做得呢個選擇幫仔女入呢間學校，就要預咗。依家班家長叫生叫死，都無補於事。」

精選娛聞，喺晒《娛果》
http://fb.com/appledailyent