由Sowon、Yerin、Eunha、Yuju、SinB與Umji組合嘅6人女團GFriend，於前年出道即掀起話題，同年9月喺江原道公開演唱時遇上天雨令舞台積水，當佢哋表演歌曲《Me Gustas Tu》期間跣腳跌足6次，片段隨即喺網上洗版，就連英、美媒體都有報道，可謂「一仆成名」。雖然GFriend因為該次意外大開知名度，不過就憑實力獲得認證，去年推出嘅歌曲《Rough》更獲頒多個獎項。

GFriend出道兩年多，今年4月喺首爾舉行出道以來第一場粉絲見面會，門票僅開賣1分鐘即宣佈售罄，力證人氣，而GFriend更食住個勢，於下月16號嚟到香港亞博館，舉行由美亞綜藝、本地舞台、輝皇娛樂及項華有限公司主辦嘅《2017 GFRIEND Mini Concert in Hong Kong》，今次係GFriend繼去年《MAMA音樂頒獎禮》後再次訪港獻唱，令粉絲相當期待。