韓國天團BIGBANG嘅T.O.P早前捲入醜聞，被爆曾喺寓所吸食大麻，同場仲有一名女練習生韓瑞希，韓瑞希因為吸食大麻已被判3年有期徒刑，緩刑4年執行，同時接受120小時嘅藥物治療，及罰款87萬韓圜(約6,000港元)。

當時韓瑞希曾提出上訴，又指T.O.P講大話，聲稱冇誘導T.O.P吸食大麻。點知韓瑞希之後又突然取消上訴，表示會接受一審嘅判決。不過檢察方就認為喺一審韓瑞希嘅判決太輕，所以就向法院提出上訴，二審今日進行。

今日韓瑞希刻意打扮現身法庭，佢現身時有大批傳媒採訪，而裁判部門指韓瑞希嘅犯罪內容雖然唔輕，認為一審嘅判決冇唔恰當嘅地方，所以就駁回檢方嘅上訴，維持之前嘅判決。

而韓瑞希離開法院時亦有接受傳媒訪問，佢對於事件表示深切嘅歉意，承諾會反省中，亦強調自己唔會再犯同樣嘅事情。對於原本決定上訴但最終又取消上訴，韓瑞希就解釋係因為聽取了律師意見後，所以決定上訴，但之後經過深思熟慮後就覺得接受判決會比較好，所以就撤銷上訴。

提及T.O.P方面指被韓瑞希誘導食大麻，但韓瑞希之後就指係T.O.P先提出吸食大麻，自己冇誘導對方，令人覺得供詞有別。韓瑞希話自己冇推翻證供，只係之前冇被媒體報道出來，強調由此至終自己嘅證供都係一致。