黃宗澤（Bosco）上個月初拍邵氏新劇《飛虎之雷霆極戰》，左腳意外受傷骨折，要做手術喺傷患處鑲鋼釘固定，之後三哥苗僑偉同吳卓羲等人都有去醫院探佢（新聞連結： https://bit.ly/2SvZ5Ye）。經過大約兩個星期休息，Bosco早前已逐步復工，除咗為新劇宣傳之外，《飛》劇嘅拍攝工作亦都繼續。

不過，由於Bosco仍然需要用枴杖輔助行路，所以惟有用鏡頭遷就位置，只可以拍攝佢嘅上半身，好似日前拍攝一場講佢揸電單車嘅戲，Bosco只需要戴住頭盔，坐喺一張凳上面扮揸車就得。

今日Bosco再喺ig放咗一條拍劇嘅花絮片，片中佢拍緊一個簡單嘅行路鏡頭，但由於佢仲未可以行動自如，導演就安排佢坐喺一張凳，再喺凳下面放路軌推住佢行，Bosco就要做出平時行路，膊頭左右擺動嘅動作。雖然只係幾步路，但拍完Bosco都忍唔住大笑，仲留言話：「導演，一個不良於行嘅人，點樣好急咁行？我真係唔識演！」搞到苟芸慧、王敏德同陳敏芝都忍唔住，喺呢個post下面留咗好多個哈哈笑emoji公仔。

精選娛聞，喺晒《娛果》
http://fb.com/appledailyent