立法會補選下年3月先至舉行，建制派早已內定人選由新民黨南區區議員陳家珮（Judy）出戰港島區，現年37歲嘅Judy面對細15年嘅疑似對手香港眾志周庭，佢就話唔會強求得到宅男同後生仔支持，笑稱「如果有宅男支持我都驚」，又話自知年紀比人大，無可能逆齡生長，惟有希望獨立同在職媽媽形象，可以為自己爭取選票喇。

除咗民主派對手，剛剛勝出中西區議會補選嘅自由黨楊哲安，似乎都有意同Judy爭出線，Judy話會積極約見建制黨派爭取支持，但因為新民黨主席葉劉淑儀同其他建制派議員經常被困立法會，搞到遲遲未能成事。佢話雖然選情唔樂觀，但都會全力以赴喎。