三哥苗僑偉噚晚喺灣仔搞生日P，由晚上7點幾開始，玩咗6個鐘，啲人圈中好友陸續走人，而焦點落咗喺三哥寶貝仔苗俊身上，佢同長髮女伴現身(新聞連結： http://bit.ly/2sFsdSK )，似乎係帶女伴見家長。

凌晨1點50分，三哥囝囝苗俊好有風度，送女伴坐的士，女伴見在場咁多記者，有啲怕醜，行嗰陣有啲遮遮掩掩，問到三哥囝囝身邊女伴係唔係女友，佢揈咗兩下手未回答，之後送咗女伴走，三哥囝囝就返咗上去

三哥約凌晨2點叫咗餐廳啲侍應拎咗蛋糕同可樂俾在場守候嘅記者，過咗半個鐘，三哥同三嫂就出嚟，問到囝囝係唔係帶女朋友嚟見家長，三哥笑而不語，只係話玩得好開心，再問佢係唔係飲咗好多酒，三嫂笑住叫記者睇吓三哥個樣，三哥又係繼續笑，三嫂講：「辛苦晒!咁夜!」上車嗰陣，三哥忽然話：「早知拎埋俾你哋飲喇!」兩公婆同囝囝由司機接載離開。