【亞馬遜酒店械劫案】
【本報訊】上周二晚十多名疑隸屬國際犯罪組織「紅色司令部」的蒙面槍手搶劫秘魯東部亞馬遜地區一間豪華酒店，有歷險的香港團友憶述當時聽到多次槍聲，一度以為會被殺，只能伏在地上，幸最後全部團友平安。事件中多得當地導遊萊昂（Elías León）通風報信，捨身保護眾人，團友視他為英雄，感激他的救命之恩。

事發時酒店內有53名遊客，其中41人是香港人，他們來自兩個香港旅行團，包括捷旅假期的南美四國27天團及尊賞假期南美五國34天團。據其中一名捷旅團友John接受無綫訪問時稱，當時他與三名家人正在酒店用餐，「啱啱上完主菜，甜品都未嚟，已經有職員叫我哋起身，離開座位疏散」。

眾人祈禱念經　氣氛恐怖

各人初時還不知大難臨頭，豈料之後「啲燈進一步熄晒，佢（職員）就叫我哋全部趴低，唔好出聲。聽到七、八下槍聲，嗰時知道非同小可」，原來有槍手闖入酒店搶劫。John說全部團友都十分驚慌，「跟住我哋見到有電筒照入嚟，賊人見到我哋個個趴晒喺度」，其間賊人透過酒店職員繙譯，要各人交出金錢財物，並欲脅持兩名女團友做人質，其中有兩名團友被搶去手袋及腰包。

John表示自己當時「驚到乜嘢反應都冇，只是伏咗喺度，冇任何意識」。其間槍匪一度想將John拉起身，但不成功，他說：「諗住今次有機會（被槍殺），好驚佢開槍」。John形容，「之後就靜咗好耐，大概有45分鐘，我哋個個都唔敢郁、個個都唔敢出聲，過咗一陣有啲團友開始喊、好驚，有啲團友祈禱、有啲念經，氣氛好緊張、好恐怖」，幸最後槍匪離去。

■記者黎國剛