叮咚！Call bell響起！傭仔衝出機艙，回應呼喚佢嘅乘客寶寶。
一出到去，見到幾個一齊坐嘅澳洲乘客。

（以下對話已翻譯成中文）

傭仔：「請問有咩可以幫到你？」

乘客：「我有幾個friends，唔該你畀我哋一人一罐啤酒。」

於是傭仔就畀咗啤酒佢哋，隔咗半個鐘，call bell又響起……

乘客：「唔該再畀多我哋幾罐啤酒。」

再隔多半個鐘，佢哋又問攞多次……由於事態嚴重，再咁飲落去唔係辦法，於是傭仔就report咗畀阿姐（乘務長）聽：

「阿姐阿姐！有幾個客已經攞咗幾次啤酒飲，仲畀唔畀佢好呀？」

阿姐：「畀，不過畀嗰陣畀多杯水！同埋隔耐啲先畀！」

好彩最後，嗰幾個澳洲乘客都冇話飲醉或者做出任何瘋狂行為（可能佢哋平時飲酒當食生菜……）。試過有一次，有幾個好後生嘅俄羅斯乘客，成班人喺咁叫vodka飲，飲到個個high晒，喺cabin度企晒喺度勁大聲傾偈，十足開party咁款！好彩嗰陣就嚟降落，佢哋都冇咩時間嘈到其他客！

其實，喺機上攞酒飲係好正常不過嘅事，不過通常當同一個客攞兩次以上嘅酒精飲品，空中服務員就會開始對呢個客加以留意。如果乘客不斷攞酒飲，飛傭通常都會畀，因為呢個係佢哋作為乘客嘅權利，但飛傭同時會留意乘客行為，例如會唔會飲到紅都面晒或者說話失常、行為失控（俗稱仲正唔正常），當佢哋飲酒數量已經飲到引起飛傭注意，有啲senior同事會採用拖字闕方式，遲啲先畀酒佢哋，等佢哋唔好飲得太密，又或者serve佢哋嘅時候畀多杯水佢哋，問佢哋需唔需要其他果汁汽水（通常都唔需要）。

如果佢哋真係醉咗，甚至作出騷擾乘客或者影響空服員執勤嘅行為，機上面係有手扣（Restraint Device）將佢哋控制，如果佢哋嘅醉酒行為係帶有攻擊性，甚至影響航班安全，機長係有機會對佢哋發出警告信，甚至有最終權力請佢哋落機㗎！

不過touch wood，傭仔飛咗就嚟三年都未遇到最後要offload佢哋嘅瘋狂醉酒客，亦唔希望將來會遇到！

專欄作者簡介：
空中飛傭（傭仔）
做過廣告、設計、插畫，而家係香港茄子航空嘅一名空少，喺維記澳洲航空交流中。2016年曾出版人生第一本繪本《空少傭乜易》，夢想係成為一個少女系漫畫家。用文字同插畫，同您分享喺飛機上面工作嘅點滴。

Facebook Link：
www.facebook.com/theflyingmaid