初三賀歲賽大摩贏孖寶，現時15Win繼續追落後，以其養馬量計，最少要贏50Win才合格，既有水位，吼摩廐馬絕對可行，起碼贏出的馬多有賠率。

大摩今戰八駒均有一定份量，八駒中最熱門係用雷神「和諧氣氛」，回報低不捧也罷！反而其他馬值得花心思，頭場「合拍飛龍」，由1月1日開始短短一個半月已跑四場，並由46分大幅落到刻下37分，係大摩廐內唯一的一匹五班馬，表面罕見但手法卻不陌生，上季有「和諧氣氛」，再之前有「感恩」，均由四班起步輸落五班反彈，

今次「合拍飛龍」除頭罩忽換鄭雨滇，季內騎練合作有兩勝三位，係大摩今季愛用的冷殺手。另外尾場「喜蓮獎星」亦有得博，事關大摩打吡共八駒報名，除最高106分「明月千里」篤定可出線外，其餘七駒均未有把握拎到入場券，當中唯獨「喜蓮獎星」一出入Q，只要今場再交到好表現，打吡入場券肯定到手，所以亦肯定有戰意！