陳詩慧今日負傷去商台為電影主題曲《太空艙》宣傳，講到右肩傷患，佢笑住話要投訴大師林敏驄「行兇」，事源日前喺電影慶功宴上，詩慧乘機問大師自己填詞填得如何，點知大師回覆一句「吔蕉」再一手抓落佢右肩，詩慧話：「嗰晚阿Bob（林盛斌）唔喺度，佢仲當我喺阿Bob，起碼打咗我5巴以上，最後我要話再打我就咀你，佢先停。」

不過詩慧都冇嬲，仲笑指可能大師已經打通咗佢任督二脈，嚟緊作品應該會再好啲。

詩慧又話日前收到公司通知，呢首《太空艙》獲大陸老闆力讚兼表明要力推，佢話：「冇諗過講國語，但會鍾意呢首歌，嗰種感覺好似有人追，因為我一直形容自己喺香港市場好似單戀咁，好愛佢去繼續寫廣東歌。」詩慧更講到從心底思考如果連佢一位小小嘅廣東歌創作人，都唔再為廣東歌出力，可能令市場再萎縮，所以佢期望音樂圈同媒體都大愛一點，無私做多少少，令廣東歌仍有發展前景。