韓國前女團2NE1成員敏智噚晚跟師弟團MyTeen喺荃灣開騷，不過演唱會就遲咗45分鐘先開始。雖然音響幾次出現問題，不過打頭陣嘅MyTeen依舊落力演出，唱《Amazing》炒熱氣氛。

MyTeen表示第二次嚟香港已經開到演唱會，心情非常激動，而且今次可以完成舉行擊掌活動嘅心願，覺得好開心。

當螢幕播出粉絲準備嘅驚喜影片時，成員都感動到眼濕濕，當中隊長恩洙更狂喊，要入後台冷靜，再次現身時恩洙依舊眼濕濕。

MyTeen演出完後，就到敏智現身表演《Ni Na No》。敏智用廣東話打招呼：「大家好，我係敏智。」話咁耐之後再嚟香港，見到大家咁熱情，覺得好開心。敏智再表演《ING》，唱《Flashlight》時MyTeen嘅準燮更驚喜現身featuring咗幾句。到安哥時，敏智又落台行入觀眾席，近距離冧粉絲，更大講「我愛你哋」先離開。