今年都未過，最近內地網站「搜狐」就急不及待整咗個上半年嘅「爛片評選」，當中《一代宗師》離奇入圍。

而噚日結果都公佈咗，林志玲喺新片《富春山居圖》嘅表現可以話一直有「領先優勢」，毫無懸念拿下爛片影后.....做唔到最好，就做最差....起碼可以留名嘛。

而爛片影帝就由《忠烈楊家將》嘅鄭伊健奪得，評審更毫不留情點評伊健演技係「面癱」，唔理佢係開心，好嬲，定係就嚟死，都係同一個表情。

而最爛電影，之前《富春山居圖》投票都唔係一直領先o架，之前係中國賀歲片《快樂到家》排頭位，不過截止投票前，《富春山居圖》又發力，終於成為今年上半年爛片之霸，亦好有機會成為今年一整年嘅爛片之霸。之前提過惡評如潮嘅《小時代》，都排第2位，評審同樣非常毒舌，話此片適合智商停留喺14歲或以前嘅女士睇，不過「智商沖擊感」都係未及《富春山居圖》，而去睇呢部電影嘅人亦被網友戲稱做「腦殘粉」。