國際乒聯世界巡迴賽嘅其中一站中國公開賽而家喺成都打得如火如荼，今日上演第二日賽事，港隊代表杜凱琹/李皓晴喺女雙四強出局，由於賽事不設季軍戰，所以港隊繼杜凱琹喺U21女單攞到一面銅牌後，再添一銅；而黃鎮廷就喺男單16強以4:0擊敗日本球手松平健太晉級。

杜凱琹/李皓晴噚日喺女雙八強對住新加坡組合周一涵/林葉，港隊呢隊現時世界排名第六嘅組合毫不手軟，以11:5、11:8同11:6，直落三局擊敗對手。兩人晉級後對住新科德國世界乒乓球錦標賽女雙冠軍、中國組合丁寧/劉詩雯，過程就無咁順利，最後以0:3落敗，獲得銅牌。男雙方面，黃鎮廷拍住何鈞傑出戰，佢地喺八強對碰中國組合樊振東/許昕，對手貴為新科世錦賽冠軍，「黃何配」先贏一局12:10，雖然之後連輸三局出局，不過都可以話係雖敗猶榮。

記者：洪量丰