每次NBA Finals決出冠軍後，總會有部份冠軍隊「綠葉」或者「茄喱啡」俾網民選中，出嚟諷刺無冠球星，好似新鮮出爐總冠軍勇士除咗杜蘭特（Kevin Durant）首嘗終極勝利滋味，仲有柏治利亞（Zaza Pachulia）為格魯吉亞爭光、36歲老將大衛韋斯（David West）首獲加冕、M班尼斯（Matt Barnes）延續「We Believe」一代精神等，但最受網民歡迎嘅當然係「Shaqtin a Fool」常客麥伊（JaVale McGee），尤其是佢喺Game 5坐足全場！不過，麥伊喺晉級過程中都有唔少功勞，特別係勤力拼搶燃點士氣方面相當抵讚架！麥伊賽後亦喺twitter延續幽默本色，表示：「我係歷來唯一一位擁有『老鼠尾』（髮型）同NBA總冠軍嘅球員！」

有人歡喜有人愁，騎士兩位季中簽入嘅老將迪朗威廉士（Deron Williams）同高華（Kyle Korver）延續無冠噩夢，其中D-Will今場再度「食蛋」成為眾矢之的，更被網民嘲諷為「進攻終結者」成為笑柄，認真慘情。