費達拿喺今季傷癒復出後表現出色，除贏得澳網同港網冠軍外，世界排名亦重上第二。呢位「瑞士天王」接受《SFR Sport》訪問時，就暗示新球季可能會好似今年咁，再次放棄法網，換取較多休息時間。

費天王喺今個月30號就會夥拍瑞士同胞賓絲出戰賀文盃，為新球季做準備，而佢仲話：「對我嚟講，澳網、溫網同美網係最重要嘅！」佢喺職業生涯中，只試過喺2009年贏得法網，所以策略性放棄紅土賽事去休息都唔出奇。費達拿仲話祖高域、梅禮、華域加同錦織圭等前列球手復出，會令到新季競爭更加激烈㖭。

現年36歲嘅費天王自1998年轉打職業，下年將會係佢嘅職業生涯第20年，但佢直言未有打算掛拍：「我希望再打多幾年。」

--------------------
球迷一定要知！英超一哥曼城，已經登陸『BFB』！登入即送藍月球星： http://bit.ly/2AAiPDS