當年今日
關於我們

【名家搶先睇】另類睇市方法(上)(散子)

蘋果日報 2018/09/10 17:24

散子

個市呢頭升返上兩萬八,轉個頭幾日又打穿兩萬七,測市者又再一次轉向,重新吹起淡風,傳統技術指數亦不少人都講過,所以今次散子拎返一啲另類指標出嚟,等大家分折下大市會向南走定向北走。
正所謂各處鄉村各處例,另類指標嘅嘢都一樣,傳統上我哋都會睇美國佬,佢哋嘅另類指標,包括美大學入學指數、口紅或內衣指數、擦鞋童理論,紅酒指數、巨無霸指數等等,大家都耳熟能詳,所以就唔多講。
但自從中港兩地股市互聯互通之後,港股A股化已經成為大勢,要講呢啲另類嘢,一定要睇A股大媽睇乜嘢。
一、88%魔咒,意思係股票型基金倉位水平去到88%,A股市場會出現大跌。應驗史:2009年7月29日、2009年11月24日、2010年11月12日,上證綜指三次大跌,基金倉位分別是86.01%、89.68%以及88.95%。缺點:A股全流動後,基金A股市場地位已大不如前。
二、證券行湊仔指標,股民炒股投入程度會隨股價上落而變化,當家庭主婦都全情投入,股市變得瘋狂,亦都係崩潰嘅先兆。應驗史:無機構作正式統計。缺點:自動化之後,唔少師奶都留家炒股,出證券行次數減少。
三、光頭指標,唔少男士到一定嘅年紀,頭髮開始不如以前般濃密,唔好誤會,呢個唔係生髮水廣告,只是代表如果證券行出現嘅光頭男士較頭髮濃密嘅男士多,代表市場參與者經驗會比較豐富,由於經驗充足,呢批人亦都無年青人咁勇,即係話股市無咁容易失控。應驗史:都係無正式統計。缺點:唔係個個上年紀嘅男土都係脫髮問題。
四、王菲結婚指標,王菲兩次婚事都好似刺激咗A股爆升。應驗史:有股民統計過王菲同竇唯1996年結婚,滬指由753點升到2245點;王菲同李亞鵬2005年7月結婚,滬指由998點升到6124點。缺點:要等到王菲再結婚先有得升。
就有如文章開首提到,各處鄉村各處例,所以散子都有準備到香港版嘅另類指標,但由於字數關係,所以決定分兩個星期寫,所以下回繼續。
散子
全球樓行 Dream House零距離
https://hk.feature.appledaily.com/overseasproperty