自反送中運動以來，受社會氣氛影響，不少店舖生意一落千丈，更有小商戶因入不敷支而倒閉結業。但開業才一年多的大埔糖果黃店「菓。紫龍」，老闆卻反其道而行，選擇逆市擴充，在區內另一商場開分店，已於10月中開業。另在本港有14間分店的夾公仔連鎖店Big Bear負責人指，警暴令人怯於外出消費，整體生意額雖下跌約3成，但相信消費氣氛會好轉，計劃未來半年新增5間分店。

記者：林穎嵐 趙媛媛 龔蕙芝

訪問「菓。紫龍」老闆張先生當日，適逢11月2日港島、九龍舉行流水式集會，他以一台細手推車搬運數箱礦泉水，打算放在過海巴士站旁，供出外參與集會人士自取。以往數次大遊行，他均花費數百至1,000元派發飲料，「最多嗰次應該係大埔（衝突），派咗40幾50箱。」他又在飲料紙箱上放置文宣，供路人傳閱。

張透露，60多呎的總店月租約2.1萬元，開業至今約一年半，抗爭運動對生意影響不算大，「都係夠交租、夠自己人工囉，賺蝕每個月差唔多。」但自運動蔓延至大埔後，商場人流大幅減少，平日生意額下跌約3成，靠周六、日生意拉上補下。他指10月生意最差，「有時可能7點坐到8點，20蚊都收唔到，數埋差唔多10幾20日都有（提早關門）。」

小商戶虧損的金額，對比大商戶或微不足道，但也為他們造成巨大重擔。張已動用積蓄應付，「都係有限數，2、3萬咁上下」，又透露開業時投資15萬元仍未回本，但他只輕笑數聲道：「慢慢啦，係咁㗎啦。」 猶幸業主有良心，9月中主動提及減租，答應租金減1,000元。

生意虧蝕，市道低迷及不明朗，但張於6至7月時仍決定開分店，「一間舖去唔晒啲貨，攞去揼又好似好嘥，咪開多間諗住分吓啲貨。」他毅然簽下「一年死、一年生」租約，100呎新店租金約1.5萬元，他預計最初有虧損，但相信顧客以街坊為主，生意不會受太大影響。

支持抗爭者令生意受影響，張坦言偶爾會感矛盾，「但你話辛苦呀，難頂嚟講，後生仔嗰啲仲難頂啦。」他認為社會問題積累多年，香港的未來更無法用金錢衡量，「如果我後生10幾20年，都未必夠膽去做前線，真係好佩服依家班年輕人。今時今日都無謂淨係諗自己利益，諗吓大眾同埋所有香港人嘅利益好啲。」

店舖被標籤為良心黃店後，多了客人來支持，有些人購買小量糖果飲料後，會放下數百元，稱「唔使找」後匆匆離去，張便與客人上演「追逐戰」欲把錢交還，但非每次都成功，他便把捐款放在小錢箱，以此買物資，「其實黃唔黃都冇乜關係，最緊要係大家幫香港。」

訪問期間，記者遇到不少市民專程來「懲罰」張的店舖 。大埔居民陳先生是其中一位與張「追逐戰」的客人，但「不幸」被拉停，他稱明白市道差令生意難做，故常來光顧以示支持。梁同學亦指難得區內有黃店，當然要支持。另一中學生明仔謂：「知佢支持香港人，特登嚟買下嘢食。」並向張打氣稱：「你加油啦，呢段時間好難捱。」張表示感謝，又着明仔：「小心啲呀後生仔，最緊要安全。」

去年10月進駐本港經營夾公仔店的Big Bear，在抗暴之戰前，已急速擴張至14間分店，負責人蔡榮欽指，9月起生意明顯下跌，下挫約3成，「整體以前會有賺，而家就係基本上打個平咁。」

生意特別受8.31太子站事件影響，因為此後港鐵經常停開或早收，嚴重影響生意，「以前地鐵會比較夜，開到成12點幾1點。」加上警方經常無故在各區施放催淚彈，「有一晚呢邊嘅催淚彈放得好犀利，為咗員工嘅安全，直程叫員工唔好返工。」警暴令人怯於外出消費，最明顯少了年輕一輩的客戶。

在生意受影響下，蔡曾要求業主減租不果，店內租夾公仔機的台主反向他要求減租，「象徵式打個9折，希望啲台主唔需要咁大壓力，共渡時艱囉。」他直言政府有責任在現時局勢為中小企提供協助，雖然經濟情況不明朗，但他們不放棄擴充計劃，預算明年農曆新年前後，會在屯門、將軍澳、沙田、大埔、上水新增分店，「我諗呢個係一個暫時性嘅差啦，以香港人嘅拼搏精神，我相信好快，香港經濟應該會返番轉頭嘅。」

-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
【撐學生】
召集有心人 撐學生全年睇《蘋果》
立即按此
-----------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568