呢個暑假，除咗極具破壞力嘅「天鴿」襲港，仲掀起一股法治颱風，反東北13人及雙學三子因為政府覆核刑期而改判入獄，對社會帶來動盪，呢股法治旋風，下周一（11日）又捲起，上訴庭當日下午會就反東北案刑期頒布裁決理由，屆時會唔會再現「歪風（unhealthy wind）」？而家仲係未知數，但當日同時亦係四議員被DQ案嘅上訴期屆滿日，到底九龍西係咪會合併補選？還看劉小麗當日或之前會唔會提出上訴！

八方今日都有問過小麗，至今有冇最後決定？佢強調仲考慮緊上訴，積極同泛民商討中，似乎九西仲有機會，兩席分開補選。

9.11之後，9月19日亦係關鍵日，佔中九子因為參與佔領運動而被控「串謀作出公眾妨擾」等罪行案件，當日亦會提訊，勢必掀起新一場「以法達義」嘅討論，由於當中涉及兩名立法會議員陳淑莊同邵家臻，最終裁決影響立法會係咪會再少多兩個議員，難怪民主派都話要做好防風措施。

而港大學生會前會長馮敬恩去年圍堵港大校委會擾亂秩序罪成，則會喺21日宣佈裁決，唔知會唔會再多一位前學生領袖要成「階下囚」？28日則係傘運3周年，上述唔少案件，或多或少都同傘運有關連，試問又點會唔重要？