鬼佬有云，資產泡沫見頂，唔會有人敲鐘提醒。不過，人類由所羅門王開始，多年嘅炒賣，確實係有啲市場見頂跡象，一旦出現，值得去參考。

被外資行譽為「全球最泡沫化樓市」嘅香港（即深圳呢啲小小鄉鎮唔入流），可能真係出現終極見頂訊號。

係乜？孫柏文摷番自己記憶，記得2000年初，睇《華爾街日報》，喺納指衝上最高位5,00點前左右，有篇報導話當時睇淡科技股多時嘅大鱷索羅斯，因佢隻基金嚴重跑輸對手，180度飄移，瞓身追買科技股。之後納指幾年內跌到落1,100點，要15年後先再破頂。

殿堂級人士轉軚，由永遠唔信，到身體力行咁瞓身，往往就係最佳終極見頂訊號。

咁香港樓市，又出現咗啲咩殿堂級人士轉軚，令我話見頂呢？週末，我見到友報報導，話從未買過香港樓嘅立法會議員張超雄，都喺舊年年尾入市。

喺我心目中，張超雄同索羅斯都係殿堂級。雖然炒嘢級數唔同，不過論左，兩者如膠似漆。

現今花旗政權，狂吹撥亂反正之風。而對上廿年，美帝最錯、埋下最多地雷嘅政策，非「量化寬鬆」莫屬。依家不斷收水，香港樓市真係有望見多年高位。

除「量化寬鬆」重啟外，唯一變數，就係當偉大中央大規模印鈔，佢哋堵截錢流走之力，是否有效。當中央趕晒啲人用電子貨幣，可能真係印極都唔流走。呢場角力，會好有趣。

孫柏文

全球樓行 Dream House零距離
https://hk.feature.appledaily.com/overseasproperty