香港雖然地方細細，但好多地方都有自己特色，可惜偏偏啲好嘢成日都被隱藏住。
好似大埔咁吖，其實除咗林村外，仲有四里同海濱公園等等好玩嘅地方，所以大埔民政事務處𠵱家就諗緊計仔，睇吓點樣可以將呢啲地方發揚光大，其中可行方法，就係請一啲土生土長或者熟悉大埔嘅人，擔當義務導賞員，由佢哋帶住班遊客四周圍去，一盡「地主」之誼。
民政處仲諗緊可唔可以將大埔打造成新嘅水上中心，但就以坐船暢遊湖光山色為主，唔係同大尾督水上活動搶生意。有啲大埔漁民有鑑於世界難撈，有意轉型配合政府嘅水上中心；聽落呢個計劃，唔係無得搞噃，有意見都不妨向大埔民政處提出。