世界盃分組賽噚晚由衛冕嘅德國對墨西哥，結果爆大冷德國以0:1輸咗畀墨西哥，其中德國狂射25球，有9球都係墨西哥門將32歲嘅奧祖亞撲出，令墨西哥得以保清白之身。

講到呢位墨西哥門將奧祖亞，4年前喺世界盃幫墨西哥以0:0和咗巴西而成名，由於佢個樣激似56歲吳鎮宇喺《衝上雲霄》嘅Sam哥造型，而被封「墨西哥吳鎮宇」。

今日《蘋果》搵咗正版吳鎮宇，原來向少唔睇波嘅佢都知「墨西哥吳鎮宇」嘅存在，鎮宇話：「其實我好少睇波，呢個龍門似我個樣，我都有啲關注佢。其實好得意，我細個對踼波冇乜天份，每次都被安排做守門員，我覺得幾得意，但當然守門員我都冇乜天份啦。」問佢嚟緊會唔會捧吓呢位孖生兄弟場？鎮宇話：「我會呀我會呀，有啲親切感吖嘛，但我一離開咗啲麻甩佬，我就獲得唔到啲世界盃資訊，所以我都唔知嚟緊佢會踼邊幾場咩時間。」

嚟緊墨西哥會喺今個月25號晚11點對南韓，免費電視ViuTV到時會直播，Sam哥留意啦！

一網睇盡
足動世盃 直擊俄國最前線
https://hk.feature.appledaily.com/worldcup2018/

精選娛聞，喺晒《娛果》
http://fb.com/appledailyent