迷你債券爆煲隨時觸發政治風暴，港府財金高官噚日總動員到立法會解畫，加上十幾廿個銀行高層列席，墟冚場面媲美當年入市打大鱷，甚至有過之而無不及。一眾官員、賓架俾議員當眾狂鬧，搞到頭耷耷，迷債苦主睇到，可能略為順氣。
最注重個「信」字嘅銀行被指係迷債黨，賓架頓成過街老鼠，負責監管嘅高官都責無旁貸，苦主群情洶湧，議員矛頭直指財爺鬍鬚曾同金管局任總，財金雙雄一時之間可能唔知如何安慰損失慘重散戶，噚日去到立法會，唔敢面對苦主。幾十個苦主一早去到立法會外等候，想向高官陳情，點知官員卻兜路行，任總更靜雞雞竄入去，避見苦主，有人直斥佢係縮頭烏龜。

下屬護駕保安昅實

會議小休時，鬍鬚曾爭取時間上廁所方便，八方見到財爺下屬狀甚緊張，有人更跟埋一齊入去，老細做私事，使唔使貼身跟到實呀！咦？唔對路喎，點解立法會保安員都好似咁緊張嘅，守候喺廁所外走廊左望右望，煲呔到立法會時，戒備都好似冇咁凝重。
鬍鬚曾辦小事，成班人如臨大敵，有人同八方講，由於呢個廁所唔係官員、議員專用，旁聽會議嘅雷曼苦主都可以使用，可能有關方面怕苦主乘機闖入廁所，趁財爺最脆弱、最疏於防範同無招架之力時，直接向佢投訴銀行騙財，惟有派人護駕，讓財爺有個寧靜空間暢快解決，唔使心驚腳震！

失魂唔知廁所喺邊

後來到任總要解決時，雖然冇下屬陪同傍住，不過保安人員都一樣唔敢鬆懈。有人話任總好似唔知男廁喺邊，要人指路先知碇，佢係立法會常客，冇理由唔知碇，唔通噚日俾議員質到失魂，定係牽掛市況心不在焉，搞到唔認得路，要佢自己先知嘞。講到尾如果高官怕俾苦主追到上門，應該做好自己份工，早知今日，何必當初？就算笠個紙袋出街都走唔甩㗎喇。
睇戲都有話，出得嚟行，遲早要還，一旦證實無良銀行當客戶係羊牯，劏得就劏殺得就殺，輸盡小市民血汗錢，八方相信迷債黨始終自食其果。高官有監管之責，如果失職放生違規銀行，被追究責任，問責下台都好應份，繼續靠佢哋保障小投資者，仲得人驚。

mailto:[email protected]