由英國男星班尼狄甘巴貝治（Benedict Cumberbatch）主演嘅MARVEL超級英雄電影《奇異博士》（Doctor Strange）來勢洶洶，11月初將於美國上映，香港更會喺本月26日會率先開畫，班尼狄甘巴貝治、金像女星泰達史雲頓（Tilda Swinton）同埋導演史葛迪歷克遜（Scott Derrickson）會於本周訪港，以香港作為全球宣傳活動首站，亦係MARVEL STUDIOS首次邀請電影主角及導演來臨香港宣傳電影。

身為班尼狄忠實粉絲嘅鄭裕玲連日來都喺Ig期待偶像到港，今日Do姐再上載同《奇異博士》海報合照，仲留言話：「I'll be seeing you on Thursday。」

班尼狄襲港嘅行程十分保密，電影公司拒絕公開其抵港時間及入住邊間酒店，據知三人於明天抵埗，而班尼狄、泰達、導演史葛鐵定周四早上10點假Ritz Carlton酒店Ball Room舉行記者會，相信以兩位巨星及導演級數，下榻五星級嘅Ritz Carlton機會相當之大。而同日晚上8點幾，眾人更會拉隊到文化中心行紅地毯，據知盛會喺靠近海旁位置嘅露天廣場進行。由於班尼狄留港期間只有呢個公開活動，所以粉絲要見偶像只有爭取呢次機會，屆時Facebook及YouTube都會現場直播。

就香港未來幾日天氣唔多穩定，MARVEL方面表示如果當日天氣惡劣，活動場地、時間等會有改動。《奇異博士》已定11月4日內地上映，班尼狄、泰達、史葛結束香港行將直飛上海，於當地繼續宣傳。