美國電影藝術及科學學院 ( The Academy of Motion Picture Arts and Sciences ) 宣佈今年會加入928名，令成員名單再創新高。本屆新邀請名單男女比例為51：49，女性會員在所有會員的比例增至31%。

華人影星有劉德華、金城武同張艾嘉獲邀加入之外，唔少本地幕後人員都受邀請加入包括《一代宗師》監製彭綺華、《英雄本色》作曲顧家輝、《重慶森林》、《十面埋伏》化妝師關莉娜、《無間道》服裝設計利碧君、剪接嘅張嘉輝等。

大陸演藝界方面有導演婁燁、紀錄片導演杜海濱、範儉、《臥虎藏龍》髮型設計及化妝師仇小梅、《金陵十三釵》、《芳華》編劇嚴歌苓、動畫《大世界》導演劉健、《狄仁杰之通天帝國》演員趙楠、華誼兄弟電影公司老闆王中軍、王中磊及博納電影公司老闆于冬。

韓國方面亦有多名韓國電影人都獲加入奧斯卡評委陣容。（新聞連結： https://bit.ly/2KkSGLi ）

台灣方面有負責《千禧萬波》音樂嘅林強、《臥虎藏龍》編劇王蕙玲、《最好的時光》美指黃文英。

美國本土方面《Call Me by Your Name》男主角添麥菲查洛美（Timothée Chalamet）同Luca Guadagnino、《盜海豪情：8美千嬌》飾珠寶鑑證專家嘅Mindy Kaling，以及憑《花邊教主》（Gossip Girl）奠定女神地位多年嘅碧琪麗芙莉（Blake Lively）等，小書《哈利波特》（Harry Porter）系列作者J.K羅琳，亦獲編劇部門邀請。佢哋都將會有份投票選出明年2月舉行奧斯卡金像獎嘅得獎人選。

奧斯卡金像獎委員會由各個界別、超過八千多名電影工作者組成，以一人一票方式選出獎項，想成為會員亦唔簡單，演員必須有三部長片作品，其他類別則需要有兩部，之後需再由兩名現任會員提名，先有機會擔任評委。

前年參與奧斯卡審評工作嘅潘恒生，早前曾透露大會會喺L.A.、倫敦、悉尼安排戲院，委員可以憑證入場睇戲，或者要求寄啲copy自己所選地址欣賞，因為電影公司都想爭取多啲人睇佢哋嘅戲，然後投票支持。

佢仲話最佳導演、電影都可以投一票，前年佢就主要投咗票畀《星聲夢裡人》（LaLa Land）。有權利自然有義務，佢話要有投票權就要入會交會費，第一年免費，第二年就要交300蚊美金（約2,340港元）續會。

其實點先可以入到會呢？美國電影藝術與科學學院成員係實行邀請制，需要收到主管委員會嘅邀請先能入會，咁獲邀請嘅嘅影人必須要喺電影業有一定嘅特殊成就，又或者係才華橫溢、在業界獲得有較高嘅榮譽同知名度，又或曾經得過學院獎嘅提名，或為電影業的發展做出過傑出的貢獻。

首年加入嘅新成員，將自動獲得一個為期10年嘅投票權，喺呢10年內，如果會員一直活躍喺電影行業之中，咁佢會得第2個10年嘅投票權，之後到第3個10年；依然活躍影壇，咁呢位成員就可以得到終身投票權，盧燕同鄔君梅早於95年已經成為美國奧斯卡金像獎嘅終身評委。不過擁有投票權嘅奧斯卡評委約有6000名，華人評委僅僅幾十人，其實好難左右以白人為主嘅奧斯卡賽果。

精選娛聞，喺晒《娛果》
http://fb.com/appledailyent