本港澳洲籍年輕祈普敦欠缺支持，正處於水深火熱環境，元旦日（1月1日）賽事報名表早前公佈後，各位騎師如常搵座騎，但據知暫時祈普敦連一匹賽駒都book唔到，會否「自動停賽」，明日(30日)排位公佈便有分曉。

莫講想喺新一年爭取一個好開始，就一個咁重要嘅賽馬日都冇份參與，真係無奈。

祈普敦同巴度都係廿幾歲，大家都可以做到116、117磅，同樣熟悉香港馬圈嘅生態環境，但巴度三度喺冬季嚟香港客串，都深受練馬師歡迎，最大分別係態度，眼見巴度經常主動同練馬師交談同爭取策馬參與試閘。

反觀祈普敦今季較為沉靜，晨操出現次數亦較少，反而間唔中都會去港島大浪灣滑浪「避世」，兩人互相比較之下，難免輸蝕，祈普敦嘅公司騎師牌照明年2月17日就到期，想續牌留低真係要加把勁。

講番巴度，今日（29日）第八場三班2000米草地、高伯新馬房隻「協勝神駒」上季喺羅理雅胯下贏出1400米後，幕後已部署出戰今屆四歲系列大賽，包括三月嘅打吡。

「協勝神駒」今季三戰都唔入三甲，但上場1600米跑入殿軍表現回勇，巴度話「協勝神駒」體重超過1200磅，需要較多時間熱身，亦察覺到隻馬落腳愈來愈慢，所以今場增程挑戰2000米啱數，如果今場繼續交出後勁，幕後必定對打吡更有信心。