當年今日
關於我們

【NBA頒獎禮】感謝兄弟、家人犧牲 MVP韋少有洋蔥

蘋果日報 2017/06/27 15:55

NBA雷霆韋斯卜克MVP常規賽MVP韋少

雷霆控衛韋斯卜克(Russell Westbrook)喺周一NBA頒獎禮以高票當選常規賽MVP,雖然佢最初仲識搞笑,攞定張長到爆嘅感謝名單「貓紙」朗讀,但之後邀請在場隊友好似T吉遜(Taj Gibson)、簡達(Enes Kanter)上台時就忍唔住流下男兒淚:「My guys, my guys. 呢度好明顯唔齊人,但佢哋都係我嘅好兄弟,整個球季犧牲咗好多。呢個對我嚟講當然係美好一季,但如果冇咗佢哋,根本冇可能成真,所以呢個獎唔只屬於我,同時屬於佢哋。」
韋少之後多謝OKC球迷同團隊,最後講起屋企人時再次眼泛淚光:「我同自己講過唔好喊,但…你哋願意犧牲一切,令我哋嘅家庭團結一致。我真係好感恩,如果冇咗你哋,根本冇可能做得到…細佬,你係我嘅榜樣,我真心仰望你,我為世上…大家知唔知,佢兩星期前攞到master學位,我唔只為呢樣嘢而自豪,佢每場波半場時候都會傳短訊畀我,因為佢擁有一顆善良嘅心,好關心我。最後係我美麗嘅妻子,自從第一日見到你,我就知道你係獨特一個。感謝你無論好壞都陪伴我,每次返到屋企,就算場波戰果好壞,只要我見到你嘅笑容,陰霾就會一掃而空…你係世上最好嘅妻子,我愛你。」
empty
韋少興奮同MVP獎座合照!