踢完第1輪分組賽之後，已經聽到好多行家及嚟德國睇波嘅各地球迷講，非洲球隊今屆唔似得以前咁，完全無貨賣。呢日被某行家認為表現最曳嘅多哥，對住可以多次摸和前度冠軍法國嘅瑞士，肯定無運行。
今屆5支非洲球隊當中，喺第1輪分組賽，唯一有分落袋嘅係H組球隊突尼西亞；但呢1分都係搶得好險，幾乎輸埋畀被視為決賽周魚腩部隊之一嘅沙特阿拉伯。乜解究非洲球隊呢次表現咁差呢？華度認為呢幾隊非洲隊，有得踢呢屆決賽周，多少都拜其他非洲實力較強球隊，如塞內加爾、喀麥隆及尼日利亞等，喺外圍賽出現齊齊踩蕉皮情況所賜。

非洲代表良莠不齊

有個行家都點頭認同，呢位記者來自印尼，叫伊魯文度，同一代「菲律賓棍魔」伊魯山度都差唔多樣；華度一聽到印尼呢個地方，即刻諗起4隻字──「印尼大莊」？伊魯文度話佢只係個體育記者，唔知咁多賭波嘅嘢，更唔識咩叫大莊。
華度見索唔到好料，惟有問番佢點睇非洲球隊餘下比賽表現；伊魯文度就話唔使奢望，叠埋心水場場支持下對家，可能仲開心。好似呢日多哥對住瑞士，話晒瑞士喺上1輪分組賽，以及外圍賽，幾次對住法國都唔使輸；多哥今仗想和都難，「讓球主客和」嘅「和局」就有機會！文：華度
採訪隊推介
華度心水：讓球主客和：多哥和[+1]