沙田馬場明晚（12日）泥地賽事四班1650米拆開兩組，葉楚航有兩駒報名、鄭俊偉則報三駒，「榮冠大道」及「正時機」被編入頭場，潘頓無騎前駒，轉騎後駒會由冷變熱，論近況論證明，「榮冠大道」毫不輸蝕。

「榮冠大道」今季較遲起步，1月才復出，更難突破三班高位，重返四班也經連敗，才能重新跑起狀態。

葉楚航一直安排其避戰泥地，集中跑谷草，輸到評分由高位回至現水平，時間表到季尾，前仗報泥地1800米，場地、步速、賽事形勢都唔配合，落敗與狀態無關。

上次改配潘頓，改爭谷草長途，隨即有表現便是最佳證明，今次隔兩周，縮程改爭泥地一哩，遇上拆組，對手四散，可算再有另一次黃金機會。

全場只有「喜盈運」季內識贏泥地，其餘最叻上名，對上一捷在同程取得的「榮冠大道」，有埋1檔換何澤堯，條件絕不下於「正時機」。

第五場四班泥地1200米，「星叻」與廐侶「酷比哥」幾似，靠速度、賺形勢贏泥地同程，加磅再出，遇逆轉局面，無法克服難度，接住再轉跑谷草，條件無大變下，更難突破。

「星叻」連輸兩場後，羅富全只好面對現實，除安排復爭泥地1200米外，還棄用田泰安，改配陳嘉熙減十磅。

「星叻」由前仗131磅、上仗133磅，變孭123磅，條件已唔同，抽埋3檔，碰巧同場其餘快馬，全抽佢外側起步，此消彼長下，今次會博佢返來。

-----------------------------
【新聞有價】6月17日起 繼續撐蘋果
http://bit.ly/2IJ24ZR