飲食人誌:
志偉搞新舖樣樣都要熱辣辣
曾志偉有份的Anytime奇華21世紀餐廳,終於在九龍有了第一間分店,在食街亞士厘道掛起招牌大鐘。新店除了裝修風格零舍不同,入牆式電視播放魚樂無窮,可以聽埋爵士音樂外,志偉注重菜式熱辣辣的風格亦在新菜牌中表露無遺,就連甜品都要熱辣辣就知啦!
記者:邵超
攝影:Wing
顧客亦可以嚟到Anytime的VIP房搞一個私人派對,請朋友食私房菜。平時鍾意下廚煮幾味的志偉,朋友遍天下,不少住九龍的朋友要求他在九龍開舖,終於開了這間地舖私房菜的Anytime。
「每餐一定要有啖熱飯落肚」
原本志偉一本正經同我傾食經,不過當拍照用的煲仔飯一出現,見到他的眼睛射出奇異的光彩,傳聞中的「大飯桶」即時現形。志偉鍾意飯的程度,憑他好似執到金的笑容表露無遺。
「我每餐一定要有啖熱飯落肚,即使食壽司食到好飽,最後我都要叫一碗熱飯。」
絕對贊同!我同樣係嗰種一日無飯就覺得肚皮空空嘅人,呢種心理好奇怪,但係同道中人就會明白箇中滋味。
「我去北京拍戲食飯,一定叫碗熱湯,因為通常飯係凍冰冰,撈埋啲湯整泡飯。廣東人食飯最緊要有熱湯、熱飯同熱茶嘛!」
拍《無間道》掃飯落地好開心
志偉咁識歎,一向好樂意公諸同好。早兩個月在北京一棟三層樓房拍劇,一有空檔就捲起衫袖親自下廚。
「拍戲等埋位,佢哋喺另一邊拍,讓個廚房位畀我煮飯。北京人唔識乜嘢叫滋補靚湯,我朝早煲兩款滾湯,夜晚多啲時間煲老火湯,每個湯有唔同效用。」
拍戲通常冇啖好食,但跟住志偉就有好嘢食,不過有時戲中就冇食得安樂呢回事。諗起《無間道》入面,志偉飾演的韓琛掃晒所有飯菜落地,場面都幾震撼。
「啲飯本身其實幾好味,但拍戲要拍多個角度,等到拍完之後都唔好味啦!可以掃晒落地我都唔知幾開心。」
其實難怪志偉掃得咁開心,辛苦賺來志在食,如果啲嘢唔好食,真係對唔住自己,何況返到Anytime私家廚房,自己腦海裏的食物都可以夢想成真,不知幾幸福!
志偉自細就想開茶餐廳
志偉在Anytime有另一個身份,就是飲食顧問,𠵱家我哋喺店裏食到的大部份食物,其實是志偉的私家菜譜。細路時代的志偉,已經發夢有一間自己的餐廳,放晒所有最鍾意食的茶餐廳食物落去。大個仔,志偉無論食到邊度,吃到好味的菜式,就會即刻請教廚師抄下烹調心得,返到Anytime便拿出來研究。
「識食嘅人都識煮,識食至會煮到好多Combination嘅嘢,我食嘢鍾意Fusion多,傳統嘅都可以有新食法,好似隨手拎起即食嘅一碗碗糯米飯都可以變成壽司手捲食法。」
Anytime奇華21世紀冰室
地址:尖沙嘴亞士厘道31號九龍中心地下A室
電話:23144232
營業時間:12:00nn-12:00pm
備註:私房菜最低消費每位$150