噚日花旗舉行財經新聞獎頒獎典禮,上述幾位仁兄都係評判。Fit馬以前係財金官員,又係少數面面俱圓、公關手段高明嘅高官,無論顏值定經驗值都開正𠵱家政府最欠缺嗰瓣,好多人都覺得佢一定被人羅致。
點知佢被主持人問多兩問,竟然講真話:「根本都冇人接觸我!」冇Connect喎。
Fit馬講起林鄭呢位舊同事亦好特別,佢話:「佢(林鄭)做嘢好認真,點會有趣事?」又話當年自己管商務局,林鄭管發展局,「兩個都唔同跑道,點會步伐一致?我搭飛機多、佢行路多」。而且,佢「冇受過消防員訓練」,入熱廚房都係唔好預佢嘞。
教大校長張仁良都避唔開呢個話題,佢話,做得大學校長,有義務畀意見政府。大學合約2018年完結,有冇機會要改口叫局長司長咁?張仁良就含蓄咁話,畀咗意見,希望佢哋搵到個更合適嘅人喇,又賣定口乖,叫就快上任教大校董會主席嘅Fit馬,手下留情,唔好炒佢魷魚。陳家樂被問到阿哥陳家強會唔會留任政府,就十問九「唔知」。
李華華
mailto:
[email protected]